"Պատվո Ուղի" ծրագիրը երիտասարդության բարոյահայրենասիրական դաստիարակության մոդել է: Այն հիմնված է Մարտիկի Պատվո Կանոնի վրա և ներառում է տարբեր մշակույթների Մարտիկի Պատվո Կանոնների համեմատական վերլուծություն և հայ Մարտիկի  հիմնական արժեքներն ու որակները: Մարտիկն այն անձն է, ով կյանքի յուրաքանչյուր պահը դիտարկում է որպես ճակատամարտ` ընդդեմ Չարիքի և հանուն Բարու` անվախ պայքարելով վեհ արժեքների համար,   հաղթահարելով կյանքի բազմաթիվ խոչընդոտներ, հավատարիմ մնալով սեփական սկզբունքներին և անմնացորդ, անձնազոհ նվիրվելով իր Հայրենիքին ու ազգին/ժողովրդին` սերտորեն կապված լինելով իր հետ` մնալով արարող և ներդաշնակ ողջ աշխարհի հետ:

Կենտրոնական գաղափարն է նոր սերնդի ոգևորումը տարբեր մշակույթների Մարտիկի կերպարներով /Հայկական մարտիկ, Ճապոնական Սամուրայ, Ռուսական բոգատիր, Եվրոպական ասպետ, Սկանդինավյան վիկինգ, Տոլտեկների մարտիկ, Պարսկական փահլևան, Կովկասյան ջիգիթ և այլոք, ինչպես նաև տարբեր պատմական մարտական միաբանություններ` Տաճարականներ, Հոսպիտալյերներ, Ասսասիններ և այլն/ և բարոյահայրենասիրական դաստիարակությունը նրանց գաղափարներով և Պատվո Կանոնով.

• Սերմանել նոր սերնդի մեջ բարոյական և հայրենասիրական բարձր արժեքներ` կարեկցանք ու նվիրվածություն, պատվախնդրություն ու արժանապատվություն, պատասխանատվության զգացում ու հյուրասիրություն:

• Ծանոթացնել նոր սերնդին տարբեր մշակույթների Մարտիկի պատմական կերպարների գաղափարների, արժեքների և որակների հետ, նպաստել մարտիկի կերպարի և որակների արժևորմանը:

• Ոգևորել նոր սերնդին պատմական հերոսների գաղափարներով և անհատական սխրանքներով:

• Նպաստել Մարտիկի ընկալմանը ոչ թե բռնության և դաժանության տեսանկյունից, ինչպես հաճախ տեղի է ունենում, այլ` որպես պայքարի մարմնավորում` հանուն Բարու և ընդդեմ Չարի:

• Ապահովել նոր սերնդի մտավոր, բարոյական և հոգևոր զարգացում` բարելավելով երևակայությունը, ֆանտազիան, պատկերացումը, ինչպես նաև համագարծակցելու և փոխըմբռնման ունակությունները:

• Նպաստել երիտասարդության շրջանում սեփական ազգի և Հայրենիքի հետ կապվածության սերտացմանը, Հայոց պատմական ժառանգության և ազգային արժեքների ճանաչմանն ու կարևորմանը:

• Պետության և հասարակության ուշադրությունը սևեռել կրթության և դաստիարակության անհրաժեշտության` որպես զարգացման կարևորագույն հիմքի, վրա:

• Վերականգնել և ուժեղացնել Հայոց Դպրոցի դաստիարակչական ֆունկցիան` ապահովելով նոր սերնդի ճիշտ և լիարժեք զարգացումը:

• Հզորացնել Ազգային Բանակի գաղափարական հիմքը, նպաստել Ազգային Բանակի հեղինակության բարձրացմանը:

Ծրագիրը ներառում է.

• "Պատվո Կանոն" ընդլայնված դասախոսություններ բուհերում և դպրոցներում /նախատեսվում է նաև զորամասերում/,

• "Պատվո Կանոն" հատուկ մշակված թրեյնինգներ երեխաների և երիտասարդության տարբեր խմբերի համար,

• Բազմաբովանդակ դպրոց-ճամբարներ երեխաների և երիտասարդության տարբեր խմբերի համար,

• Կրթամշակութային մրցույթներ Պատվո Կանոնի շուրջ /Տուրնիրներ/,

• Կրթամշակութային զանգվածային միջոցառումներ /ցուցահանդեսներ, մրցույթներ, ֆլեշ-մոբ և այլն/:

        Ծրագրի շրջանակներում մենք մշակել ենք "Հայկ Նահապետի Պատգամ"-ը, որում վկայակոչվում են մեր էությունը մարմնավորող կերպարները` Հայկ Նահապետ, Վահագն, Սասնա Դավիթ... Լիահույս ենք, որ այն ուղեցույց կհանդիսանա հայոց համար:

Պատգամի միջոցով Հայության մեջ հայկյան շունչը արթնացնելու նպատակով այն պիտի տարածվի նախ և առաջ Հայոց դպրության օջախներում` և Հայաստանի Հանրապետությունում, և Սփյուռքում, ինչպես նաև հայկական բոլոր կազմակերպություններում, գրասենյակներում և այլն, ինչն էլ ազգային զարթոնքի մեծ խթան կհանդիսանա:

Սույն ազգանվեր առաքելությունն ի կատար ածելու համար մենք ակնկալում ենք բոլոր հայրենասեր և բարերար հայերի աջակցությունը և դիմում բոլորին նշված Աստվածահաճո ծրագրի իրականացման համար: